تونقال

سحر تئزدن سوت قارداشیم صادیغینان قوزولاری بیر بیرینه قاتیب چوله آپارماق ایسته ییردیک؛نه ایسه آنامین یاپدیغی بوی قاتلی لاواش چوره گینین ایی بیر دونه ده قاپی باجانی بوروموشدو؛آنام قرآن واراغی کیمین کونده نی یاییب لاواش یاپان اوستونه سرنده قاپیدان کئچن هر کیمسه ای وورماسین دئییه باش اوزادیب سلمی خالانین آغ لاواشینی یئمک ایستردیرلر؛صادیق آناسیزبیر اوغلان اوشاغی اولدوغونا گوره آتاسی اونو هله کورپه چاغلارین نان آناما تاپیشیرمیشدیر کی ننه لیک تاپداغینان آماندا قالا بیلسین؛چونکو صادیغین آناسی او سوت دورونو یاشایاندا نه ایسه آغیر بیر خسته لیک اوجوباتین نان دونیاسینی دَییشمیشدیر؛صادیغین آتاسینین مالی دورومو یاخشی اولاراق سونرالار اوغلونو باش کنده گوندریب عالیه تحصیلی ائله میشدیر؛من ایسه آتا بابا یوردو دئییه کتده قالیب مالدارلیغینان مشغول اولموشدوم؛زامان گئدیشاتیندا صادیق کند ساکینلی آتاسینی ایتیرسه ده منده آنامی الدن وئریب اونون لم یئسیر قویوب گئدیگی اوت اوجاغی ایستی ساخلاماق ایسته ییردیم؛حاخدان کئچمه یه سن دئییه آنام ساغ ایکن هر دونه صادیق کنده گلنده سلمی خالا آدینان یئرلی یئرینده اونون سر سوقاتینی گتیرردی؛کند گوروشو باش توتوب هر واخت آنامی گورنده اوجا حیات یولداشینی صادالاییب اوجا سسینن دئییردی سلمی خالانین یاپدیغی بوی قات لاواشین تامی هله ده وارمنیم داماغیمنان گئتمه ییبدیر؛سونداندا بیز ایکی یولداش ائوین بیر بوجاغینا سیخیلاراق زمانه میزین آجیلی شیرینلی اولایلارینان دانیشیب آرخادا قویدوغوموز گونلری حسرتله یاد ائله ییردیک؛ایللر اوتدوگجه کند یاشامیدا چهره سینی دَییشیب داها تندیر قالاییب چورک یاپما عنعنه سی شهردن چورک آلینماغینان یئر =عوضله مه گه باشلامیشدیر؛بو ایلده قیزمار یایین گیره جگی دئییه یولداشیم صادیغین گلمه گینی گوزل ییردیم ؛واخت وعده باشا چاتان کیمین اوتن گون قولاغیم چالدی کی صادیقدا آرواد اوشاغی ایلا بیرگه گلیب هله لیک آتا ائولرینده اوتورموشدو دوغما دوغار باجی سینین قوناغیدیر؛گئجه یا الله قارداش دئییب قاپمیزدان گیرنده بیر دونه ده کئچمیش گونلری خاطیرلایاق بیر ائوین اوشاغی کیمین بیربیریمیزه قوجاق آچیب بیر دونه ده گوروش مه لی اولدوق؛چای زاد ایچین نن سونرا کوهنه دوستومون گوذارانین سوروشوب هله نه ایشینن مشغول اولدوغونو دوشوننده او.دا یادینا دوشن کیمین چانتاسین نان بیر کیتاب چیخارداراق بیله مه ساری اوزاداندا دئدی بو یئنی کتابی سلمی خالانین آغ لاواشی حاققیندا یازمیشام؛یولداشیمین بو قدیر شیناسلیغینان مورگوله نرک کتابی واراقلایاندا گوردوم حیات یولداشیم ایللر بویو آماندا ساخلادیغی آنامین لاواش یاپانین گتیررک دئدی بوداایرحمتدیک .....................